2 operacione policore në Elbasan, do trafikonin armë dhe drogë drejt Maqedonisë, 3 të arrestuar
Tre persona janë arrestuar në Elbasan gjatë dy operacioneve të ndryshme brenda 12 orësh. Policia njofton se në kuadër të megaoperacionit “Tempulli 2”
Tre persona janë arrestuar në Elbasan gjatë dy operacioneve të ndryshme brenda 12 orësh.
Policia njofton se në kuadër të megaoperacionit “Tempulli 2” u arrestua 28-vjeçari me iniciale E.A, pasi u kap 27.3 kg kanabis, të cilën do e transportonte drejt Maqedonisë së Veriut.
“Në kuadër të operacionit antidrogë të koduar “Bags”, në fshatin Rrajcë, Prrenjas, shërbimet e Policisë lokalizuan dhe ndaluan për kontroll, automjetin tip “Toyota”, me drejtues shtetasin E. A., 28 vjeç, banues në Fushë Krujë. Në këtë automjet u gjetën 2 qese me rreth 27.3 kg lëndë narkotike cannabis sativa, sasi e cila dyshohet se do të trafikohej nga shtetasi E. A., drejt RMV-së. Në përfundim të veprimeve procedurale u arrestua në flagrancë 28-vjeçari dhe u sekuestrua sasia e lëndës narkotike”, njofton policia.
Ndërsa në kuadër të operacionit “Sundimi i ligjit” u arrestuan dy të rinj nga Divjaka, të cilët u kapën me 1 armë zjarri kallashnikov dhe 114 fishekë luftarak që dyshohet se posedoheshin me qëllim trafikimin drejt RMV-së.
“Në kuadër të operacionit “Entrance”, në hyrje të qytetit të Elbasanit, u lokalizua dhe u ndalua për kontroll, automjeti tip “Audi”, me drejtues shtetasin S. M., 21 vjeç, dhe ku ishte pasagjer shtetasi A. M., 22 vjeç, të dy banues në Divjakë. Në këtë automjet u gjet 1 armë zjarri kallashnikov dhe 114 fishekë luftarak që dyshohet se posedoheshin me qëllim trafikimin drejt RMV-së. Në përfundim të veprimeve procedurale u arrestuan në flagrancë të 2 shtetasit, si dhe u sekuestruan arma e zjarrit dhe municioni”, njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme./vizionplus.tv
What's Your Reaction?