“Më falni që mbijetova, por po kthehem”, kryeministri sllovak mesazh opozitës pasi i shpëtoi atentatit

Kryeministri i Sllovakisë Robert Fico njoftoi të martën se po rifillon detyrat e tij, pothuajse dy muaj pas atentatit të 15 majit.

59-vjeçari Fico u qëllua katër herë nga një distancë e afërt pas një mbledhjeje kabineti në një qytet në Sllovakinë qendrore. Atij iu desh t’i nënshtrohej dy operacioneve të gjata.

Për këtë tentativë, poeti 71-vjeçar Yurai Tsintula u akuzua për një sulm terrorist dhe u la në paraburgim.

Fico doli nga spitali më 31 maj dhe bëri daljen e tij të parë publike të premten e kaluar, në një event në Bratislavë.

Sipas mediave sllovake, Fico ka shkuar në mbledhjen e sotme të kabinetit përmes një tuneli për të shmangur gazetarët.

“Kërkoj falje që mbijetova, por po kthehem”

“Të nderuara media progresive dhe liberale dhe e dashur opozitë, kërkoj falje që mbijetova, por po kthehem ”, ka shkruar ai në Facebook, duke postuar një foto të tij në zyrën e tij.

Për shkak të lëndimeve të tij, Fico përdor paterica kur ecën. Fico është kryeministri i një qeverie tre-partiake që përfshin partinë centriste Smer-SD, qendrën Hlas dhe SNS-në e ekstremit të djathtë. Pasi mori detyrën vjeshtën e kaluar, ai pezulloi ndihmën ushtarake të Sllovakisë për Ukrainën.

Vetë Fico ka qenë në favor të bisedimeve të paqes me Rusinë, ashtu si edhe homologu i tij hungarez Viktor Orbán.

Në një fjalim javën e kaluar ai përshëndeti vizitën e diskutueshme të Orbanit në Moskë, duke thënë se do të dëshironte të ishte vetë atje nëse e lejonte shëndeti i tij./vizionplus.tv