Tjetër vatër zjarri në Lurë, digjen 10 ha me pemë halore

Nga Dritan Kurti

Pasi është bërë e mundur që të vihet nën kontroll vatra e zjarrit në fshatin Gurë-Lurë, një tjetër vatër është aktivizuar këtë të enjte.

Zjarri është shfaqur në vendin e quajtur “Maja e Bakullimës” e cila është e veshur me pemë halore.

Mësohet se janë djegur mbi 10 ha kullotë dhe pyje halore. Teksa flakët vijojnë të jenë shumë aktive dhe të djegin çfarë iu del para, terreni i thepisur me shkëmbinj që herë pas here shkëputen, e bën të vështirë fikjen e zjarrit.

Në terren janë të angazhuar punonjës MZSH-se, punonjës të AdZM Dibër, punonjës të Drejtorisë së Bujqësisë e Pyjeve të Bashkisë, punonjës të Njësisë Administrative Lure si dhe vullnetarë. Temperaturat e larta dhe era e fortë po favorizojnë përhapjen e zjarrit.