Fituesit në Olimpiadën e Parisit do marrin me vete “copëza” të Kullës Eiffel

Atletët të cilët dalin fitues në Lojërat Olimpike të Parisit këtë vit do marrin me vete një pjesë të historisë…

Medaljet që do jepen këtë vit në “Qytetin e Dritës”, janë me copëza të Kullës Eiffel. Bëhet fjalë për copa hekuri 6-këndore që peshojnë nga 18 gramë, të marra nga monumenti ikonë i Parisit i cili u ndërtua në 1889-ën. Ato do futen në secilën prej medaljeve, të arit, argjendit dhe bronzit.

Medaljet janë projektuar nga shtëpia franceze e bizhuve “Chaumet”.

“Ideja erdhi pas një sërë diskutimesh. Ne kuptuarm që ka një simbol që njihet në mbarë botën dhe ai është Kulla Eiffel”, u shpreh organizatori kryesor i Lojërave Verore Joachim Roncin.

Në total, janë përgatitur 5084 medalje.

Në qendër të secilës janë të ngulitura pjesët e hekurit, që mbahen në vend përmes shtojcave metalike. Këto copëza hekuri janë në ngjyrën e tyre origjinale dhe janë gdhendur me frazën “Paris 2024” së bashku me imazhin e pishtarit olimpik dhe pesë unazave olimpike.

Në anën tjetër të medaljeve shfaqet imazhi i Nike, perëndeshës greke të fitores, që qëndron përballë Stadiumit Panathenaic të Athinës, Akropolit dhe Kullës Eifel.

/a.r