Venecia vendos kufizime për turistët, nuk lejohen grupet me më shumë se 25 persona

Venecia do të kufizojë nga sot madhësinë e grupeve turistike në 25 persona në një përpjekje tjetër për të kufizuar ndikimin e turmave të vizitorëve në qytet.

Autoritetet lokale do të ndalojnë gjithashtu përdorimin e altoparlantëve nga guidat turistike si pjesë e masave që synojnë “mbrojtjen e qetësisë së banorëve” dhe sigurimin e lëvizjes më të lirë të këmbësorëve.

Ata që nuk respektojnë këto masa të reja, të cilat fillimisht ishin planifikuar të hynin në fuqi në qershor, por u shtynë deri në fillim të gushtit, do të përballen me gjoba që variojnë nga 25 deri në 500 euro.

Kufizimet mbulojnë qendrën e qytetit si dhe ishujt Murano, Burano dhe Torcello.

Në prill, Venecia u bë qyteti i parë në botë që prezantoi një sistem pagese për turistët në një eksperiment që synonte të dekurajonte vizitorët ditor që të mbërrinin atje gjatë periudhave të pikut.

Sistemi, i cili u ndoq nga afër nga destinacione të tjera të njohura evropiane, zgjati vetëm 29 ditë dhe përfundoi në korrik, duke hapur rrugën për një periudhë konsultimi për të vendosur se si do ta çonte skemën përpara.

Megjithatë, ka përjashtime nga rregullat për grupet turistike. Fëmijët deri në 2 vjeç nuk përfshihen në numër dhe kufizimi hiqet për studentët që vizitojnë qytetin ose në një udhëtim edukativ. /vizionplus.tv