Sulmi izraelit në shkolla dhe xhami, shkon në 93 numri i viktimave, civilët po luteshin kur u goditën

Sipas zyrtarëve lokalë, të paktën 93 palestinezë janë vrarë pas sulmit izraelit në një shkollë dhe xhami në Gaza, ku strehoheshin personat e zhvendosur.

Mbrojtja Civile e Gazës tha se njerëzit po kryenin lutjet e sabahut në kompleksin Al-Tabi’in në lagjen Al-Daraj në pjesën lindore të qytetit të Gazës kur ndodhi sulmi.

Izraeli konfirmoi se kreu sulmin, duke thënë se Hamasi po vepronte atje.

“Ne gjetëm të paktën 90 njerëz që ishin vrarë,” tha zëdhënësi i Mbrojtjes Civile të Gazës, Mahmoud Basal për CNN, duke shtuar se “shumë prej tyre janë copëtuar, shumë janë ende të paidentifikuar”.

Videot e para nga CNN tregojnë një numër të madh trupash të shpërndara në tokë.

Dëshmitarët thanë se nuk kishte asnjë paralajmërim paraprak për sulmin.

“Të gjithë këta njerëz që u vunë në shënjestër ishin civilë, fëmijë të paarmatosur, të moshuar, burra dhe gra,” tha Fares Afana, drejtor i ambulancës dhe urgjencës në Gazën veriore.

“Këta ishin njerëz të pafajshëm që luteshin … ku është e gjithë bota?” tha një burrë, i cili humbi vajzën, dhëndrin dhe nipërit e tij.

Forcat e Mbrojtjes të Izraelit (IDF) konfirmuan për CNN se goditën kompleksin, duke thënë se forcat e saj ajrore “goditën me saktësi terroristët e Hamasit që vepronin brenda një qendre komandimi dhe kontrolli të Hamasit të ngulitur” në ndërtesë.

IDF kundërshtoi numrin e të vdekurve të dhënë nga autoritetet e Gazës. CNN nuk mund të verifikojë në mënyrë të pavarur shifrat.

Sulmi i së shtunës është i pesti në një shkollë në Gaza nga ushtria izraelite që nga e diela e kaluar, sipas raportimeve të mëparshme të CNN. Zyra e OKB-së për të Drejtat e Njeriut në fillim të kësaj jave tha se ishte “e tmerruar nga modeli i shpalosur” i sulmeve ndaj shkollave në Gaza, sipas një deklarate më 5 gusht, duke shtuar se “sulme të tilla po përshkallëzohen”.

Aksioni ushtarak izraelit në Gaza ka vrarë rreth 40,000 palestinezë dhe plagosur mbi 90,000, sipas Ministrisë së Shëndetësisë të Gazës. Që nga fillimi i korrikut, gati 2 milionë njerëz ishin zhvendosur në enclave, pothuajse e gjithë popullsia e saj, sipas shifrave nga Kombet e Bashkuara.

Izraeli nisi ofensivën ushtarake më 7 tetor, pasi grupi militant Hamas sulmoi Izraelin jugor. Të paktën 1200 njerëz u vranë dhe më shumë se 250 të tjerë u rrëmbyen në sulmin e udhëhequr nga Hamasi, sipas autoriteteve izraelite./vizionplus.tv