Tentoi të kalonte kufirin me drogë me vete, vihet nën hetim 25-vjeçarja nga Kosova

Policia ka vënë nën hetim një 25-vjeçare nga Kosova, e cila ka tentuar të kalojë kufirin me drogë me vete.

Aksioni është kryer nga Policia e Shkodrës, nëpërmjet Sektorit për Hetimin e Narkotikëve dhe Policinë Kufitare.

E dyshuara nën akuzë është shtetasja me inicialet G. G., e cila u pikas dhe kap në Pikën e Kalimit Kufitar Muriqan.

“Gjatë procedurave të verifikimit dhe kontrollit në dalje nga territori i Republikës së Shqipërisë, shërbimet i gjetën kësaj shtetaseje një sasi të vogël lënde e dyshuar narkotike e llojit kanabis, e cila u sekuestrua në cilësinë e provës materiale”, thanë burime zyrtare të policisë lokale.

Paraprakisht e dyshuara ka pretenduar se nuk kishte dijeni për lëndën narkotike, teksa hetimet i vijon prokuroria vendore, për zbardhjen e plotë të ngjarjes.

Policia nuk ka dhënë detaje të tjera për momentin, nëse kosovarja ka precedentë penalë apo është e lidhur me aktivitetin kriminal.