U arrestua sot, kush është Andrew Bode, akuzohet se ekzekutoi me breshëri plumbash Edmond Papën! Julian Kalemi e strehoi në banesë

GJIROKASTËR– Andrew (Edvin) Bode i shpallur në kërkim për vrasjen e Edmond Papës në Selitë në Tiranë në dhjetor të vitit 2022, është arrestuar nga një operacion i zhvilluar nga forcat Renea dhe policia e Gjirokastrës.

Gjithashtu është arrestuar Andrea alias Adriatik Kalemi dhe Julian Kalemi, i cili kishte strehuar në banesë Andrew Boden.

Andrew Bode, 44 vjeç, me origjinë nga Berati, dyshohet të jetë ekzekutori i Edmond Papës në 16 dhjetor në zonën e Selitës në Tiranë. Bode, njihet dhe me emrin Edvin Bode, por për shkak të problemeve me drejtësinë e ka ndërruar para disa vitesh. Megjithatë në gjendjen civile rezulton i regjistruar me emrin Andrew Bode.

Dyshohet se Bode u ndihmua nga Albano Velo për të eleminuar Papën për tu hakmarrë për vrasjen e Aleksandër Sadikajt në qershor të vitit 2022. Sadikajt iu bë atentat me tritol dhe i riu nuk mundi që t’i mbijetonte plagëve.

Si u ekzekutua Edmond Papa

Papa u ekzekutua mbrëmjen e 16 dhjetorit në hyrje të një lokali në rrugën “Fadil Bodinaku“ Tiranë. Ai sapo ishte ulur në lokal kur u qëllua me 9 plumba nga një person i maskuar. Edhe pse 49-vjeçari u dërgua në Spitalin e Traumës, nuk mundi t’u mbijetojë plagëve të marra.

Biznesmeni me origjinë nga Rroskoveci, jetonte mes Sarandës dhe Anglisë. Ai kishte ardhur në Tiranë më 16 Dhjetor tek vëllai i tij, që banonte pak metra larg lokalit ku u qëllua për vdekje. Dëshmitarët okularë i treguan policisë se ai iu kundërpërgjigj autorit, duke e qëlluar me tavllën e duhanit në tavolinë.

Kush është Andrea Kalemi

Andrea Kalemi alias Adriatik Kalemi është kushëriri i Aleksandër Sadikajt i vrarë dy vite më parë.

51-vjeçarit Kalemit iu bë atentat në Greqi në gusht 2023 teksa ndodhej me familjen me pushime. Ai u qëllua 10 herë në limanin e Lakkas, në ishullin Paxos.

Policia greke raportoi atëherë se bëhej fjalë për një atentat për larje hesapesh dhe raportoi se atentatori ishte një shqiptar i ardhur nga Italia.

Më 5 gusht 2023 Kalemi kishte kaluar nga Kakavija bashkë me gruan dhe 3 fëmijët, ndërkohë që rezulton person me precedentë të theksuara penale./vizionplus.tv