Dogji me benzinë Melisën pasi nuk pranonte divorcin, ministri Hoxha: Dhuna në familje kërkon reagim të menjëhershëm nga institucionet përgjegjëse

Ministri i Brendshëm, Ervin Hoxha, ka reaguar lidhur me ngjarjen e rëndë të ndodhur ditën e djeshme, 31 gusht në Korçë.

Bledar Trëndafili lyeu me benzinë dhe i vuri flakën bashëshortes së tij me të cilën ishin në proces divorci. Melisa Trëndafili ndodhet në QSUT me plagë të shumta në trup të shkaktuara nga djegia.

Ministri Hoxha thekson se akte të tilla janë të papranueshme dhe tregojnë se dhuna në familje është ende një problem i cili kërkon reagim të menjëhershëm nga institucionet.

Ministri u bën thirrje qytetarëve që të denoncojnë çdo rast të dhunës në familje dhe të bashkëpunojnë me autoritetet, për t’u siguruar që ata, të cilët kryejnë këto akte, të përballen me pasojat e veprimeve të tyre, ashtu siç do të përballet dhe autori i ngjarjes së djeshme.

Bledar Trëndafili nuk është lokalizuar ende nga autoritetet dhe vijon të jetë në arrati.

Ervin Hoxha: Ngjarja e rëndë e ndodhur dje në Korçë, ku një bashkëshort në proces divorci, tentoi të djegë me benzinë gruan e tij, është një akt i papranueshëm që na kujton se dhuna në familje është ende një problem që nuk mund të injorohet e që kërkon reagim të menjëhershëm nga institucionet përgjegjëse dhe nga e gjithë shoqëria.

Ngjarje të tilla janë një shkelje e rëndë e të drejtave të njeriut dhe një apel i fortë për të siguruar mbrojtje më të fuqishme për të gjithë ata që vuajnë nga dhuna në familje, sidomos për të miturit, vajzat dhe gratë.

Jam i bindur se, për të parandaluar dhe trajtuar raste të tilla nuk mjafton vetëm reagimi i institucioneve përkatëse, por dhe solidariteti e sensibilizimi i shoqërisë tonë, në mënyrë që askush të mos i nënshtrohet një trajtimi të tillë të papranueshëm, si rasti i Korçës.

Ndaj u bëj thirrje qytetarëve të denoncojnë çdo rast të dhunës në familje dhe të bashkëpunojnë me autoritetet, për t’u siguruar që ata, të cilët kryejnë këto akte, të përballen me pasojat e veprimeve të tyre, ashtu siç do të përballet dhe autori i ngjarjes së djeshme!

Si ministër i Brendshëm shpreh mbështetjen time më të madhe për viktimat e dhunës në familje dhe angazhimin tim për të punuar parreshtur për një shoqëri, ku secili të ndjehet i ndjehet i sigurt dhe i respektuar.

Duke i uruar shërim sa më të shpejtë zonjës – viktimë e dhunës në familje dje në Korçë – shpreh angazhimin tim për të forcuar mekanizmat e mbrojtjes dhe mbështetjes së duhur për viktimat si ajo, dhe ftoj edhe institucionet e tjera përgjegjëse të veprojnë shpejt e në përputhje me politikat e qeverisë sonë për luftën ndaj dhunës në familje./vizionplus.tv