Të paktën 40 të vdekur nga bombardimet izraelite të zonës humanitare në Khan Younis

Mbrojtja civile e Rripit të Gazës njoftoi se të paktën 40 njerëz u vranë në një bombardim izraelit në zonën e shpallur humanitare Al Maëasi, në Khan Younis (jug), ndërsa forcat e armatosura izraelite raportuan nga ana e tyre se ata goditën një qendër komanduese të Hamasit.

Po ashtu, autoritetet njoftuan më herët se të paktën 20 tenda morën flakë, ndërsa raketat izraelite shkaktuan kratere deri në nëntë metra të thellë.

 “Familje të tëra u shkatërruan në masakrën në al-Maëashi”, tha një tjetër zyrtar i mbrojtjes civile, Mahmoud Basal.

Ushtria izraelite tha nga ana e saj se goditi terroristë të rëndësishëm të Hamasit që vepronin në një qendër komandimi dhe kontrolli të ngulitur në zonën humanitare në Khan Yunis, duke shtuar se terroristët po kryenin sulme terroriste kundër ushtarëve dhe të shtetit të Izraelit.

“Organizatat terroriste në Rripin e Gazës vazhdojnë të abuzojnë sistematikisht me infrastrukturën politike dhe humanitare, duke përfshirë zonën e shpallur humanitare, për t’u përfshirë në aktivitete terroriste,” insistoi ai.

Hamasi mohoi se anëtarët e krahut të tij ushtarak ishin në zonën e bombarduar humanitare.

Pothuajse e gjithë popullsia prej rreth 2.4 milionë banorësh në Rripin e Gazës është zhvendosur vazhdimisht me forcë, disa familje janë larguar dhjetë ose më shumë herë, që kur shpërtheu lufta në enklavë tetorin e kaluar./vizionplus.tv