VIDEO / “U ushtrua dhunë në Laç!” Partizani publikon provat: Kërkojmë masa nga FSHF dhe Policia

Ndeshja mes Laçit dhe Partizanit u ndërpre në pjesën e dytë kur nga tribuna u hodhën sende të forta që goditën në kokë zyrtarin e klubit të kuq, Ildi Dajlani.

Sfida u ndërpre për disa minuta dhe u rifillua më tej normalisht nga gjyqtari Juxhin Xhaja.

Por, klubi Partizani, nëpërmjet rrjeteve sociale ka dalë me një reagim ku kërkon që të merren masa pasi ka pamje filmike që tregojnë momentin e goditjes së zyrtarit të saj.

Partizani i ka bërë thirrje Federatës Shqiptare të Futbollit dhe Policisë së Shtetit që të ndërhyjë për këto ngjarje.

Reagimi i Klubit Partizani:

Klubi Futbollit Partizani dënon ashpër dhunën e ushtruar sot në stadiumin e Laçit gjatë takimit Laçi – Partizani i vlefshëm për javën e 5-të të Kategorisë Superiore! Ndonëse Partizani kishte udhëtuar sot për në Laç, për të luajtur vetëm një ndeshje futbolli është gjendur në mes të një situate aspak normale, që nuk ka lidhje fare me futbollin apo më keq akoma me rregullat “Fair Play”.

Dhuna verbale u shoqëruar me një dhunë fizike duke u goditur jo vetëm zyrtarët e Klubit tonë, por edhe futbollistët që kishin zbritur në fushë të ushtronin profesionin e vet. Kërkojmë me forcë, reagimin dhe veprimin sipas rregullave nga FSHF, duke qenë se pamjet janë të qarta dhe dhuna ka vazhduar edhe ndaj zyrtarëve të ndeshjes përveç atyre të klubit tonë.

Klubi i Futbollit Partizani kërkon edhe nga organet e Policisë së Shtetit të evidentojë dhunuesit që këtë radhë vijnë nga tribuna e “ashtuquajtur” VIP dhe të dërgohen para drejtësisë. Respektin që i presim dhe i përcjellim kundërshtarët në stadiumin “Arena e Demave”, pretendojmë ta gjejmë në çdo stadium apo fushë rivalësh. Dhuna nuk ka vend në sport!!!