Izraeli vendos një objektiv të ri lufte për kthimin e banorëve në veri, SHBA “kërcënon”

Izraeli e ka bërë kthimin e sigurt të banorëve në veri të vendit një qëllim zyrtar lufte, ka thënë zyra e kryeministrit.

Vendimi u mor nga kabineti i sigurisë i kryeministrit Benjamin Netanyahu të hënën.

Rreth 60,000 njerëz janë evakuuar nga Izraeli verior për shkak të sulmeve pothuajse ditore të Hezbollahut të mbështetur nga Irani në Libanin fqinj.

Luftimet ndërkufitare u përshkallëzuan më 8 tetor 2023, një ditë pas sulmit vdekjeprurës ndaj Izraelit nga persona të armatosur të Hamasit nga Rripi i Gazës,kur Hezbollahu qëlloi në pozicionet izraelite, në solidaritet me palestinezët.

“Kabineti i Sigurisë ka përditësuar objektivat e luftës për të përfshirë sa vijon: Kthimin e sigurt të banorëve të veriut në shtëpitë e tyre”, thuhet në një deklaratë nga zyra e kryeministrit. “Izraeli do të vazhdojë të veprojë për të zbatuar këtë objektiv,” shtoi ai.

Më herët të hënën, ministri izraelit i Mbrojtjes Yoav Gallant tha se e vetmja mënyrë për t’i kthyer banorët veriorë të Izraelit në shtëpitë e tyre ishte përmes “aksionit ushtarak”, gjatë një takimi me të dërguarin e SHBA-së Amos Hochstein.

Komentet e Gallant erdhën pasi u rritën spekulimet se kryeministri Benjamin Netanyahu donte ta zëvendësonte atë mes mosmarrëveshjeve midis dy tyre për luftën në Gaza.

Nga ana tjetër, sekretari amerikan i Mbrojtjes, Lloyd Austin paralajmëroi për pasojat shkatërruese të përshkallëzimit të mëtejshëm./vizionplus.tv