Von der Leyen nesër në Ukrainë, BE ndan 160 milionë euro për Ukrainën

Ursula von der Leyen njoftoi se ajo do të udhëtojë në Ukrainë nesër, të premten, dhe do të takohet me Presidentin Volodymyr Zelensky për të diskutuar përpjekjet e BE-së për të ndihmuar vendin me energji ndërsa përgatitet për dimër.

Konkretisht, Presidentja e Komisionit njoftoi se BE-ja synon të mbulojë 15% të nevojave të Ukrainës për energji këtë dimër, që korrespondon në 2.5 gw të energjisë këtë vit. 80% e termocentraleve të vendit dhe një e treta e kapacitetit të tij hidroelektrik janë shkatërruar nga sulmet ruse, vuri në dukje ajo. Ajo tha gjithashtu se deri më tani vendet e BE-së kanë arritur të dërgojnë më shumë se 10.000 gjeneratorë dhe transformatorë të energjisë. Von der Leyen njoftoi gjithashtu se, me mbështetjen e BE-së, një termocentral i tërë në Lituani po çmontohet pjesë-pjesë, i cili më pas do të rindërtohet në Ukrainë.

Presidentja e KE njoftoi se BE-ja do të ndajë 160 milionë euro për Ukrainën këtë dimër. Kjo përfshin 60 milionë euro ndihmë humanitare – për shembull për strehimore dhe ngrohës – dhe rreth 100 milionë euro për punë riparimi dhe energji të rinovueshme.

“Këto 100 milionë euro vijnë nga të ardhurat e aseteve të ngrira ruse në BE”, tha von der Leyen, duke shtuar: “Është e drejtë që Rusia të paguajë për shkatërrimin që ka shkaktuar. Ne e dimë se nevojiten më shumë”. /vizionplus.tv