The Telegraph: Si emigrantët shqiptarë pushtuan tregun e kanabisit në Britani

Qindra shqiptarë që kaluan Kanalin me varka të vogla kanë ndihmuar bandat e tyre të drogës të sigurojnë kontrolle në transportin e drogës në Britani.

Ata janë të akuzuar si punëtorë në “shtëpi bari” për të prodhuar e kultivuar drogë me vlerë deri në 2 milionë paund, bimë të cilat mund të rriten dhe korren në vetëm 12 javë.

Të dyshuarit janë zbuluar nga një hetim i fshehtë në një kanal sekret në shërbimin e koduar të mesazheve Telegram. Ky aplikacion përdoret nga më shumë se 700 shqiptarë për të shkëmbyer informacione mbi operacionet e tyre të kanabisit.

Bisedat midis anëtarëve të grupit përqendrohen në kimikatet më të mira për rritjen e bimëve, mënyrën më efektive për të korrur bimët e kanabisit, ekonominë e sigurimit të pronave për prodhimin e drogës dhe pse harqet janë më të mira se armët për të mbrojtur të korrat e tyre nga bandat rivale.

Anëtarët e grupit rrëfejnë grabitjet ku punëtorëve të “fermës” së kanabisit u janë prerë gishtat dhe pronarët kanë kërkuar 5-fish të fitimeve.

Agjencia Kombëtare e Krimit (NCA) tha se profesionalizmi i shqiptarëve shqiptarët në kultivimin e kanabisit, u ka mundësuar atyre të zhvendosin vietnamezët si ofruesit kryesorë vendas të drogës në Britani.

Britanikët konsumojnë 240 ton drogë, me vlerë 2.4 miliardë paund, në vit  dhe nuk kërkon transport të rrezikshëm ndërkufitar, sepse është prodhim vendas, sipas NCA.

Rritja e numrit të shqiptarëve që kalojnë Kanalin në vitin 2022, kur 12,685 arritën në Britaninë e Madhe me varka të vogla, ka siguruar furnizimin e gatshëm të punëtorëve të paligjshëm, të aftë në teknologjinë hidroponike që kërkohet për të rritur bimët në dhomat e errëta të shtëpive ku të gjitha dritaret janë të mbyllura.

Kjo ka çuar në rritjen e fokusit të policisë në prodhimin vendas të kanabisit. Rreth 29 shqiptarë u dënuan vetëm në korrik për prodhim të paligjshëm të drogës. Kjo u pasua nga 24 shqiptarë të tjerë që u paraqitën para gjykatave në gusht.

Rreth 101 emigrantë të paligjshëm shqiptarë u dënuan me më shumë se 300 vite burg në tre muaj në fund të vitit të kaluar. Tre të katërtat e tyre u dënuan për vepra të lidhura me prodhimin e kanabisit në të gjithë Anglinë dhe Uellsin në shtëpi bari.

Shumë nga emigrantët e paligjshëm u rekrutuan nga bandat pasi një goditje e qeverisë ndaj punës së ekonomisë së zezë e bëri të vështirë për ta gjetjen e punës.

Gjobat për pronarët që punësojnë emigrantë të paligjshëm janë trefishuar deri në 60,000 £ për punëtor, për ta bërë praktikën të dëmshme ekonomikisht.

Policia është e shqetësuar se Telegram është kthyer në një platformë të përshtatshme për kriminelët. Ka 900 milionë përdorues, por vetëm rreth 100 punonjës.

Pavel Durov, themeluesi i Telegram me origjinë ruse, u arrestua në Francë këtë verë për dështimin e pretenduar të saj për të luftuar përdorimin e shërbimit për krim, duke përfshirë përhapjen e materialit për abuzim seksual të fëmijëve .

Kanali i shqiptarëve shkon me emrin “Kusho”, që do të thotë “kushëri” dhe është pseudonimi që shqiptarët i drejtohen njëri-tjetrit.

Aktualisht ka 703 anëtarë që ndajnë informacione se si të prodhohet sasia maksimale e kanabisit nga fara në bimë të rritura.

Postimet në kanal u mblodhën nga një reporter shqiptar i cili u infiltrua në grup.

“Të gjithë, ju duhet të dini se si të rritni ‘trëndafila'”, tha një nga organizatorët e kanalit.

Një tjetër anëtar renditi gjashtë kimikatet kryesore që kishin rezultuar më efektive për rritje të shpejtë dhe të shëndetshme.

Në diskutimet se si të mbroheshin “shtëpitë e barit”, një shqiptar shpjegoi se ishte më mirë të shpenzojë 337 £ për një hark me fuqi të lartë sesa një armë, sepse kapja në zotërim do të kishte një dënim më të vogël.

Disa dukeshin më pak të shqetësuar se policia do të zbulonte operacionet e tyre të paligjshme sesa sulmet dhe grabitjet nga bandat rivale.

“Shumica e grabitjeve në shtëpitë e kanabisit po ndodhin në Leicester. I kanë prerë gishtat një punëtori shqiptar”, tha një anëtar i grupit.

“Policia nuk është problemi i madh. Problemi kryesor janë grabitësit që tani po përdorin dron për të identifikuar shtëpitë. Ata zbulojnë nxehtësinë nga bimët përmes çatisë së shtëpive,” tha një shqiptar me bazë në Londër duke përdorur pseudonimin Deni.

Të tjerë u ankuan se pronarët po i paguanin për përdorimin e pronave të tyre ose kërkonin një ulje të fitimeve.

“Pronarët në Londër po paguajnë 4000 £ në muaj për një shtëpi. Nuk ia vlen fare”, tha njëri.

Një tjetër tha: Deri më tani kam investuar 31,000 £ në një shtëpi, duke përfshirë 12 mijë për mbylljen e saj dhe 12 mijë për dritat. Nuk e di nëse do t’i kthej paratë e mia. Agjencia që më ka marrë me qira shtëpinë po kërkon 9,000 paund kur produkti të jetë gati për korrje.

Verën e kaluar, policia nisi Operacionin Mille për të synuar shtëpitë e barit në MB. Mes të burgosurve ishte Nard Nidri, 34 vjeç, i cili hyri ilegalisht në Mbretërinë e Bashkuar në vitin 2022 dhe jetoi në Birmingham, më pas u transferua në Sëansea, ku punoi në një lavazh makinash, përpara se të rekrutohej për një fermë kanabisi.

Ai ishte një nga katër  të burgosur për një total prej gjashtë vjetësh në gusht, pasi policia i arrestoi ata në një pronë në Neath, në Uellsin jugor. Dy dhoma dhe papafingo ishin përshtatur dhe izoluar për të rritur bimë me një vlerë rruge prej 85,000 £.

Duke i dënuar ata, gjykatësi Geraint Ëalters tha se shtëpitë e barit që drejtoheshin nga bandat kriminale shqiptare kishin arritur “nivele epidemike” dhe, sipas gjykimit të tij, ishin kthyer në një industri.

Ai sugjeroi që autoritetet duhet të shikojnë sektorin e banesave me qira, duke vënë në dukje se ndërsa të ashtuquajturit “fermerë” të kanabisit shpesh paraqiteshin në gjykatë, pronarët dhe të tjerët që merrnin para nga qiraja e pronave që përdoreshin për operacionet në rritje, rrallë e bënin këtë.