Lufta në Lindjen e Mesme, rifillojnë fluturimet në Iran

Media shtetërore e Iranit raportoi se fluturimet kanë rifilluar në aeroportet e tij pas një pezullimi të shkurtër pas sulmit masiv me raketa të së martës mbrëma ndaj Izraelit.

Fluturimet e brendshme dhe ato ndërkombëtare janë pezulluar për arsye sigurie deri në orët e para të mëngjesit të kësaj të enjteje.

Organizata e Aviacionit Civil të Iranit konfirmoi rifillimin, duke përmendur heqjen e kufizimeve.

“Pas sigurimit të kushteve të favorshme dhe të sigurta të fluturimit dhe përfundimit të kufizimeve, linjat ajrore lejohen të kryejnë operacione fluturimi,” tha ai, sipas agjencisë zyrtare të lajmeve IRNA.

Agjencia e Sigurisë së Aviacionit të Bashkimit Evropian ka këshilluar linjat ajrore evropiane që të shmangin hapësirën ajrore iraniane deri më 31 tetor, ndërkohë që situata është nën shqyrtim të vazhdueshëm.

Paralajmërime të ngjashme u lëshuan për Izraelin dhe Libanin gjatë fundjavës./vizionplus.tv