Sulmet izraelite, Turqia nis evakuimin e qytetarëve nga Bejruti i Libanit

Turqia ka nisur evakuimin e qytetarëve nga Bejruti i Libanit, pas sulmeve nga izraeli.

Mbi 2 mijë shtetas turq dhe disa të huaj filluan të hipnin në një anije ushtarake turke e cila solli ndihma dhe do t’i largojë ata nga Bejruti.

Siç shkruajnë mediat e huaja, Zehra Cibbin, një arabe nga qyteti juglindor turk Mardin, e cila jeton në Bejrut me burrin e saj libanez, zbriti nga një autobus i mbushur me të evakuuar, me dy fëmijët e saj dhe bagazhin në dorë.

“Është e papërshkrueshme. Ata bombarduan rrugën poshtë shtëpisë sonë. Që nga ai moment, mbaroi për mua, thashë se nuk doja të qëndroja më në Bejrut”, tha Cibbin.

Cibbin tha se ata vendosën të largohen nga Bejruti nga frika për jetën e tyre, duke mos menduar se çfarë do të ndodhë kur të mbërrijnë në Turqi.