Zelensky: Çdo lëshim që i bëhet Putinit është vetëvrasës për Europën

Presidenti i Ukrainës, Volodymyr Zelensky, në fjalimin e tij drejtuar liderëve evropianë të mbledhur në një takim në Budapest, paralajmëroi sot se çdo lëshim në lidhje me Ukrainën që i jepet presidentit rus Vladimir Putin do të ishte i papranueshëm për Kievin dhe vetëvrasës për Evropën.

“Disa prej jush të mbledhur këtu rekomanduan që Ukraina t’i bëjë lëshime Putinit. Kjo është e papranueshme për Ukrainën dhe vetëvrasëse për të gjithë Evropën”, tha Zelensky, vendi i të cilit së shpejti do të përfundojë vitin e tretë të luftës kundër Rusisë.

Ai foli në samitin e komunitetit politik evropian, ku marrin pjesë zyrtarët më të lartë të Bashkimit Evropian dhe liderët e 47 vendeve evropiane.

“Nuk duhet imagjinuar se paqja mund të blihet duke treguar dobësi apo duke sakrifikuar disa pozicione evropiane apo pozicionin e një vendi europian”, tha Zelensky në një fjalim që u pa nga Agence France-Presse.

Ai paralajmëroi evropianët kundër çdo lehtësimi të presionit ndaj presidentit rus.

“Përqafimet me Putinin nuk do të shërbejnë për asgjë. Disa prej jush e kanë përqafuar për 20 vjet dhe gjërat vetëm sa po përkeqësohen. Ai mendon vetëm për luftërat dhe nuk do të ndryshojë. Vetëm presioni mund t’i vendosë kufizime”, tha Zelensky. /vizionplus.tv