Ancelotti i pret hovin Milanit: Vështirë të triumfosh në Champions me pak para, nuk kam menduar kurrë për Osimhen

Carlo Ancelotti është vetë futbolli. Një nga trajnerët më të suksesshëm ndonjëherë, jo vetëm në Champions League. Ai ka lënë mbresa të pashlyeshme praktikisht kudo ku ka qenë trajner. Në pritje për t’u bërë trajner i Brazilit në vitin 2024, “Carletto” preku tema të ndryshme, edhe për futbollin italian: “Më pëlqen ende të stërvis dita-ditës, duke gjetur zgjidhje të reja për ekipin. Futbolli ka ndryshuar shumë, por kjo ju shtyn të përmirësoheni”.

Kur flet me Ancelottin është e pamundur të mos preket tema e Milanit, i cili në dy vitet e fundit është rikthyer konkurrent në Serie A dhe në Champions League: “Nuk ka gjasa që të mund të triumfojë sërish në Evropë, sepse në futboll aspekti ekonomik është shumë i rëndësishëm.

Të konkurrosh me këdo që ka më shumë financa është e vështirë. Nëse nuk mund të blesh lojtarët më të mirë, duhet të planifikosh shumë më afatgjatë. Edhe nëse Milani ka marrë lojtarë të shkëlqyer këtë verë, përmirësimi i skuadrës dhe konkurrimi në nivelin më të lartë është i vështirë”.

Lamtumira e Maldinit nag kuqezinjtë preku edhe Ancelottin: “Çdo mbështetës i Milanit, në mënyrë të pashmangshme e do Paolo Maldinin, lëre më dikush si unë që e kisha kapiten si trajner. Lamtumira e tij solli zhgënjim, por padyshim që klubi vazhdon përpara. Kësisoji, mbetet vetëm zhgënjimi për një flamur që largohet nga kuqezinjtë. Falë njohurive dhe aftësive të tij, ai mund të bëjë çfarë të dojë në futboll në të ardhmen”.

Parashikimi i Ancelottit është i pasigurt në lidhje me Serie A: “Kampionati italian ndiqet me shumë interes në Spanjë, më shumë se në Premier League. Nuk e di se kush do të fitojë, por në rreshtin e parë e nisin Napoli, Interi, Juve dhe Milani. Pa pjesëmarrje në Kupat e Europës, Juventusi do të jetë shumë i rrezikshëm”.

Së fundi, një histori për Osimhen, i cili u lidh me Real Madridin, pas largimit të qendërsulmuesit francez, Benzema: “Osimhen është një nga sulmuesit më të fortë në Evropë, por ne kurrë nuk kemi menduar për të. Me ardhjen e Bellingham menduam për ta kompensuar lamtumirën e Benzema në një mënyrë tjetër”.

/a.r