“Autorët e sulmit në Moskë kishin kontakte në Ukrainë”, Zelenski mohon akuzat: Rusët të pyesin Inteligjencën e tyre

Ndërsa lajmi për sulmin në sallën e koncerteve në Moskë u përhap të premten (22 mars), ukrainasit e dinin se çfarë po vinte: Kievi do të fajësohej. Gjëja tjetër që ata prisnin ishin më shumë dronë dhe më shumë raketa.

Akuzat filluan pothuajse menjëherë. Në fillim ishin vetëm sugjerime, derisa presidenti Vladimir Putin deklaroi hapur se njerëzit që sulmuan Moskën ishin përpjekur të iknin në Ukrainë, të ndihmuar nga kontaktet atje. Më pas pak para agimit të së dielës dëgjuan zhurmat e shpërthimeve.

Kur Putin bëri komentet e tij të shtunën (23 mars) në një fjalim drejtuar kombit rus, ekstremistët e grupit të Shtetit Islamik kishin njoftuar tashmë se kishin kryer vrasjet. SHBA-ja kishte konfirmuar se kishte lajmëruar inteligjencën për një kërcënim në fillim të këtij muaji.

Në deklaratën e tij presidenti ukrainas Volodymyr Zelensky ishte dukshëm i zemëruar që vendi i tij po fajësohej.

Ai e përshkroi presidentin rus dhe të tjerët në Moskë si “llum” për lidhjen e sulmit atje me Kievin, ndërsa shtoi se një lider “i mjerë” rus ishte më i shqetësuar për vendosjen e sulmit në Kiev sesa për të qetësuar qytetarët e tij.

Zelenski tha se Moska kishte dërguar “qindra mijëra terroristë [të saj]” në Ukrainë që nga fillimi i pushtimit në shkurt 2022 dhe se ato trupa tani po brutalizojnë Ukrainën, në vend që të mbronin Rusinë kundër kërcënimit real të ekstremizmit.

“Ata djegin qytetet tona… ata torturojnë dhe përdhunojnë”, tha Zelenski

Më herët edhe drejtoria e inteligjencës ushtarake në Kiev e quajti “absurd” pretendimin rus se personat e armatosur u kapën duke u përpjekur të iknin përtej kufirit ukrainas.

“Është një vijë e frontit aktive e mbushur me ushtarë rusë dhe shërbime sigurie. Ideja që dikush do të shkonte atje pas organizimit të një sulmi të madh në Moskë, do të ishte ose vetëvrasëse ose budallaqe”, tha Andriy Yusov.

Sipas zyrtarëve rusë, të dyshuarit u kapën në rajonin Bryansk në rrugën e tyre drejt perëndimit për në Ukrainë.

“Nëse në të vërtetë është ndalur makina e tyre – dhe ne nuk e dimë këtë – ata mund të ishin nisur për në Bjellorusi. Është një rrugë shumë më e lehtë për të dalë nga Rusia sesa të kalosh një fushë të minuar për të shkuar në Ukrainë”, tha Zelenski.

Zelenski sugjeroi rusët të pyesnin agjencitë e tyre të inteligjencës për sulmin, në vend që të fajësonin Ukrainën.

“Kjo do të përfshinte pyetjen nëse informacioni nga SHBA ishte injoruar. Por Rusia e Putinit është spastruar nga opozita politike dhe media e pavarur, duke mos lënë askënd që t’i kërkojë me të vërtetë autoritetet përgjegjëse”, tha ai.

Në fjalimin e tij, presidenti i Ukrainës aludoi gjithashtu për një teori të errët të ngritur më herët nga agjencia e tij e inteligjencës ushtarake – se vetë autoritetet ruse ishin të lidhura me sulmin në Moskë.

Motivi i supozuar ishte për të forcuar mbajtjen e Putinit në pushtet, për të mbledhur mbështetjen për luftën e tij dhe për mobilizimin e mëtejshëm.

Sulmi terrorist në Moskë sugjeron se Rusia po përballet me një rrezik real dhe domethënës brenda kufijve të saj dhe ky është një shqetësim për presidentin rus, një njeri që urren të duket i dobët.