Detaje të reja reja nga tragjedia në Korçë, djali i familjes tregon se çfarë ndodhi një ditë para se të vdisnin me nënën dhe motrën e tij

Eleni Vangjeli 75-vjeçe dhe vajza e saj Ornela Vangjeli 54-vjeçe janë gjetur të vdekura brenda në banesën e tyre në lagjen 17 të qytetit të Korçës.

Gazetari i Vizion Plus, Tonin Frroku, raportoi më herët se ka qenë djali i familjes i cili sapo ishte kthyer nga Greqia që ka gjetur të vdekura në banesë nënën dhe motrën, pasi forcat zjarrfikëse hapën derën me forcë e cila ishte e kyçur nga brenda.

Jashtë kamerave djali i të moshuarës, njëkohësisht vëllai i shtetases tjetër të vdekur, ka treguar se ditën e shtunë ka biseduar me të motrën. Ditën e shtunë vajza ka çuar në spital nënën për shkak se kishte oksigjenin e ulët. Atje i kanë thënë që ta shtrojnë të moshuarën, por vajza s’ka pranuar ta shtrojë në spital. Janë kthyer në banesë dhe më pas nuk dihet asgjë çfarë ka ndodhur.

Dyshohet se kanë ndërruar jetë prej ditës së diel, kur kanë humbur kontaktet me familjarët. Vajza mund të ketë pësuar atak, ndërsa nëna ka vdekur pas saj. Edhe në pamundësi për të lëvizur, dhe për shkak të mungesës së ilaçeve në banesë.

Raportohet se vajza ishte me profesion mësuese në Vithkuq, vëllai që jetonte në Greqi ka ardhur vetë në banesë dhe i ka gjetur në banesë të vdekura pas ndërhyrjes së zjarrfikësve për hapjen e derës.

Njoftimi i policisë:

Më datë 01.02.2024, rreth orës 16:42, në lagjen nr. 17, Korçë, në banesë, janë gjetur pa jetë, pa shenja dhune shtetaset E. V., 75 vjeçe dhe vajza e saj O. V., 54 vjeçe. Nga të dhënat e para, rezulton se këto shtetase nuk ju ishin përgjigjur në telefon familjarëve të tyre, prej disa ditësh.

Dera e banesës së tyre është hapur nga shërbimet e zjarrfikësve, pasi ishte e kyçur nga brenda. Paraprakisht dyshohet se këto dy shtetase mund të kenë humbur jetë për shkaqe natyrale.

Grupi hetimor po punon për përcaktimin e shkaqeve të humbjes së jetës së këtyre shtetaseve dhe sqarimin e rrethanave të ngjarjes.

/Vizionplus.tv/