Inceneratori i Tiranës/ SPAK zbulon si u fry në 25 mln Euro kostoja e ndërtimit

Në një pjesë të dosjes së vendimit të gjyqtare Irena Gjoka lidhur me firmosjen e15 urdhërarresteve ndaj personave në hetim për koncesionin e inceneratorit të Tiranës zbulohet dhe mënyra si u arrit llogaritja e tarifës 29 Euro/ton që duhet të paguanin njësitë e qeverisjes vendore për depozitimin e mbetjeve.

Gjatë hetimeve SPAK ka gjetur të dhëna fiktive të vendosura në studimin e fizibilitetit, të cilët kanë rritur fiktivisht tarifën.

Pikërisht dhe zbërthimi i kompjuterit të Klodian Zotos, pronar i shoqërisë “Integrated Technology Services” sh.p.k ka zbuluar dhe si u rritën fiktivisht.

Në një email të datës 26 gusht 2016 që Klodian Zoto i dërgon adresave elektronike të shoqërisë “Paul Eurth” është bashkangjitur dhe ‘plani real i biznesit dhe jo ai shtetëror. Aty  gjenden parashikimet për planin e biznesit, ku kosto totale e investimit vlerësohet rreth 102.5 milion Euro.

Ndërsa rezulton se kostot e ndërtimit u frynë në  vlerën 25,783,080 Euro.

Në rrethanat e mësipërme rezulton se kostot e ndërtimit të vendosura në studimin e fizibilitetit 128,248,330 Euro, janë fryrë në vlerën 25,783,080 Euro.

Nga krahasimi i zërave midis të dhënave të kostos së ndërtimit sipas studimit të fizibilitetit dhe të dhënave të kostos së ndërtimit të administruara nga komunikimet me email të personave të mësipërm, rezultojnë të dhënat si më poshtë:

Rezulton se në kontratën koncesionare, të datës 31.08.2017, lidhur midis shoqërisë koncesionare “Integrated Energy BV S.P.V” sh.p.k, dhe Autoritetit Kontraktor, Ministria e Mjedisit, i është dhënë e drejta shoqërisë koncesionare që të kërkojë ndërtimin e veprave plotësuese, të cilat nuk janë pjesë e projektit aktual, por që në pikën 10.5.2 të kontratës është përcaktuar se vlera e investimit në varësi të optimizimit të projektit, koncesionari mund të përfshijë brenda të njëjtës vlerë investimi edhe kostot në lidhje me veprat plotësuese. Sipas prokurorisë, është e fryrë vlera e objekteve të përcaktuara në projekt, përderisa këto vlera do t’i lejojnë mundësinë shoqërisë koncesionare që përveç ndërtimit të objekteve të përcaktuara në projekt, të ndërtohen edhe objekte të tjera (vepra plotësuese).

-Komisioni nuk ka argumentuar sesi i ka gjetur vlerat refereuese për të përcaktuar kostot e operimit dhe mirëmbajtjes për funksionimin e impiantit (kostot e operimit të landfillit). Gjithashtu, rezulton se janë dhënë vlerësime në lidhje me shpenzimet për operimin dhe mirëmbajtjen për funksionimin e impjantit, ndërsa në tabelën e të dhënave të përgjithshme të landfillit, janë shtuar zëra të tjerë të kostove, duke ndikuar në rritjen e tarifës që është përcaktuar për t’u paguar nga Njësitë e Qeverisjes Vendore’ thuhet në faqen 21 te dosjes

Ndërkohë studimi i fizibilitetit që nxori tarifën 29euro/ton është hartuar nga komisioni i  Dhënies së Koncesionit ndërsa vetë kontrata nuk pasqyruar mënyrën e llogaritjes së tarifës.

“Gjithashtu nga aktet e administruara nga SPAK rezulton se në studimin e fizibilitetit që është hartuar nga komisioni i Dhënies së Koncesionit dhe që është ngarkuar në sistemin elektronik të prokurimit, është pasqyruar mënyra e llogaritjes së tarifës prej 29 euri/ton që duhet të paguajnë Njësitë e Qeverisjes Vendore, por pasqyrimi i mënyrës së llogaritjes së tarifës mungon në studimin e fizibilitetit që i është bashkëlidhur kontratës së lidhur mes Ministrisë së Mjedisit si Autoritet Kontraktor dhe Shoqërsië Koncesionare Integrated Energy BV SPV”