Kurthi, si e kapën grekët dhe DEA 210 kg kokainë të destinuar për në Shqipëri

Shqiptarët kanë filluar të përdorin edhe portet greke për të sjellë kokainën nga Amerika Latine në Europë, ndërsa më herët përdoreshin ato të Holandës, Belgjikës dhe Spanjës.

Kapja e një 210 kg kokainë gjatë ditës së djeshme në portin e Pireut konfirmoi se edhe Greqia është kthyer në një portë të rendësishme të futjes së kokainës nga Amerika Latine në Europë.

Kontejneri ishte nisur nga porti i Guajakilit në Ekuador dhe destinacion final kishte Shqipërinë. Katër persona, 2 shqiptarë dhe 2 grekë, u arrestuan gjatë aksionit policor.

Droga u gjet e ndarë në dy kontejnerë mes karkalecave të detit, në një bazament të dyfishtë.

Duhet theksuar se DEA amerikane ka një degë të organizuar në Greqi, e cila merret specifikisht me kokainën që futet nga vende se Ekuadori apo Kolumbia, përmes porteve greke në Europë.

Operacioni

Mësohet se agjentët e DEA-s dhe policisë greke kanë patur një të infiltruar në grupin e trafikantëve, i cili ka dhënë informacion në lidhje me lëvizjet e drogës si edhe organzimin e tyre.

I infiltruari ka orientuar grupin duke i thënë se ai kishte njohje dhe do ta nxirrte kokainën nga porti i Pireut, por ndërkohë që trafikantët e tjerë kanë mbërritur aty, janë përballur me forca të shumta policie dhe agjentë të DEA-s.

Mes të arrestuarve janë edhe shqiptarët Andrea Mërkuri dhe Marsel Stafa, krahas dy grekëve. Droga ishte e ndarë në pako 1 kilogram, të cilat kishin stampime të ndryshme, duke treguar se ishte e destinuar për disa grupe kriminale.