Kurti takohet në Stamboll me nobelistin e njohur turk Orhan Pamuk: Më tregoi interesin për Kosovën, shqiptarët dhe Ballkanin

Kryeministri i Kosovës, Albin Kurti, është takuar me shkrimtarin e njohur turk, Orhan Pamuk.

Kurti i cili ndodhet në një vizitë zyrtare në Turqi, ka takuar nga afër shkrimtarin turk, i cili ka fituar çmimin Nobel.

Përmes një postimi në rrjetin social Facebook, Kurti shprehet i entuziazmuar për takimin me Orhan Pamuk.

Krahas fotos me shkrimtarin turk, Kurti thotë se nga biseda që zhvilloi me nobelistn, kuptoi interesin e madh të Orhan Pamuk për Kosovën, shqiptarët, Ballkanin.

“Në fillim nuk i besova doktorit Bilgin Sait, që shkrimtari Orhan Pamuk po më fton për darkë. Gjersa afrohej mbrëmja, minutat më dukeshin të gjata porsi orët, ndërkaq tri orë e gjysmë me të më ikën porsi minutat. Në restoranin Sur Balık-Cihangir të lagjes Beyoğlu në Stamboll temat e bisedës ndërroheshin më shpesh se pjatat mbi tryezë. Mbase arritëm të shkruajmë përmbledhjen hyrëse të kapitujve të miqësisë sonë të ardhshme. Artisti Orhan Pamuk, fitues i çmimit Nobel për Letërsi në vitin 2006, ka një dashamirësi spontane dhe vëmendje të frikshme. Dhe, aq shumë i interesuar për Kosovën, shqiptarët, Ballkanin. Nder që nuk e shpjegoj, kënaqësi që nuk e përshkruaj”, shkruan Kurti në Facebook./vizionplus.tv/