Medvedev: Biden një “makth” për Amerikën, po përpiqet të fillojë Luftën e Tretë Botërore

Dmitry Medvedev, një aleat i presidentit rus Vladimir Putin, e përshkroi presidentin amerikan Joe Biden si një “turp” për SHBA-në sot. Në fakt, siç komentoi ai vetë, Biden nuk ka të drejtë ta krahasojë veten me Franklin Roosevelt.

Biden e filloi fjalimin e tij për gjendjen e kombit dje duke iu referuar fjalimit të Roosevelt në Kongres të vitit 1941, në të cilin presidenti i ndjerë tha se unioni po përballej me një kthesë të paprecedentë në histori.

Biden akuzoi gjithashtu rivalin republikan Donald Trump për përkulje ndaj Rusisë dhe pak më shumë se dy javë pasi e quajti Putinin një “bastard të çmendur”, ai tha se kishte një mesazh për Putinin për Ukrainën: “Ne nuk do të dorëzohemi”.

“Edhe pse Roosevelt ishte një njeri i shtypur, në një karrige me rrota, ai e nxori Amerikën nga Depresioni i Madh. Biden, nga ana tjetër, është një i çmendur, me aftësi të kufizuara mendore, i cili është i vendosur të tërheqë njerëzimin në ferr”, shkroi Medvedev, ish-president i Rusisë dhe aktualisht nënkryetar i Këshillit të Sigurimit Rus, në Platformën X.

“Roosevelt së bashku me aleatët, përfshirë BRSS, luftuan për paqen. Në vend të kësaj, Biden po përpiqet me vendosmëri dhe këmbëngulje të nisë Luftën e Tretë Botërore. Roosevelt luftoi kundër fashistëve, por Biden po lufton për ta. Është turpi i SHBA-së”, shkroi në anglisht Medvedev.

Diplomatët thonë se pikëpamjet e tij janë një tregues i të menduarit në nivelet më të larta të elitës së Kremlinit.

Lufta në Ukrainë ka ndezur një krizë të thellë në marrëdhëniet e Rusisë me Perëndimin dhe Biden ka zemëruar zyrtarët rusë duke e quajtur Putinin një “bastard të çmendur”./vizionplus.tv