Ndryshime të reja në ligjin për turizmin: Detyrim vendosja e çmimeve në vende të dukshme

Reduktimi i informalitetit, rritja e standardit të shërbimit dhe grumbullimi i të dhënave statistikore janë në fokus të ndryshimeve të reja të propozuara nga Ministria e Turizmit dhe Mjedisit në ligjin për turizmin.

Ndryshimet parashikojnë një sërë kushtesh për agroturizmet, vendosjen e çmimeve në vende të dukshme në dy gjuhë nga strukturat dhe stacionet e plazhit. Edhe ndaj sipërmarrjeve turistike të cilat i ofrojnë shërbimet online janë parashikuar detyrime.

Për strukturat akomoduese të pacertifikuara në varësi të numrit të dhomave janë parashikuar gjoba që variojnë nga 20-150 mijë Lekë. Ndërkohë për njësitë e agroturizmit gjobat variojnë nga 100-200 mijë Lekë.

Një sistem i ri statistikor do të ngrihet për grumbullimin dhe përpunimin e statistikave në sektorin e turizmit, i quajtur “Këshilli Ndërinstitucional për Statistikat në Turizëm”, i cili do të punojë paralelisht me INSTAT, e qe ka për qëllim binjakëzimin e të dhënave me Eurostat-in.

Agjencia Kombëtare e Turizmit do të jetë përgjegjëse për koordinimin dhe ecurinë e kalendarit turistik të aktiviteteve zbavitëse.

Nisma ligjore është paraqitur në Kuvend dhe pritet që në ditët në vijim t’i nënshtrohet diskutimeve në komisione dhe për t’u miratuar më pas në seancë plenare, në mënyrë që ndryshimet të nisin të japin efekte për sezonin e ri turistik.

/f.s