Po dërgonte furnizime mjekësore, sulmohet autokolona e Kryqit të Kuq në Gaza

Qyteti i Gazës është tani një fushë beteje, ku luftimet po zhvillohen në rrugë. Një muaj pas masakrës së Hamasit më 7 tetor, Izraeli vazhdon të përparojë në enklavën palestineze. Bombardime intensive janë raportuar në afërsi të spitalit al-Shifa dhe spitalit indonezian, të dy në Gazën veriore. Dhjetëra palestinezë janë vrarë në 24 orët e fundit në një valë të re të sulmeve ajrore izraelite që synonin Khan Younis në jug, Nuseirat në Gaza qendrore dhe Jabalia në veri.

Bastisjet izraelite kanë vazhduar gjatë natës dhe herët në mëngjes në zonat e okupuara të Bregut Perëndimor Akaba, Qalqilya dhe Balata.

“Për herë të parë në dekada ne po luftojmë në zemër të qytetit të Gazës, në zemër të terrorit,” tha komandanti izraelit i Frontit Jugor, Yaron Finkelman. Ndërsa ministri i Mbrojtjes Yoav Gallant ka vënë në shënjestër direkt kreun e Hamasit në Rrip.

“Yahya Sinwar është i fshehur në bunkerin e tij dhe nuk ka më kontakt me bashkëpunëtorët e tij, por ai do të eliminohet gjithashtu”.

Izraeli mbajti një minutë heshtje në të gjithë vendin në kujtim të 1,400 të vrarëve që nga fillimi i konfliktit dhe rreth 240 pengjeve.

Për personat e rrëmbyer, presidenti amerikan Joe Biden i kërkoi Netanyahut një “pauzë tre-ditore në luftime”, për të lehtësuar negociatat për lirimin e tyre.

Izraeli është  nën presionin ndërkombëtar në rritje  për të shqyrtuar një pauzë humanitare në fushatën e tij kundër Hamasit në Gaza, por ushtria izraelite këmbëngul se nuk do të ketë armëpushim dhe është e përgatitur të godasë grupin militant “kudo që të jetë e nevojshme”, duke përfshirë infrastrukturën civile.

Ndërkohë, ushtria vazhdon të fokusohet në identifikimin e bastioneve të Hamasit, tuneleve të tij dhe në eliminimin e liderëve të fraksionit islamik.

Sipas vlerësimeve të IDF, që nga fillimi i luftës më shumë se 14,000 objektiva janë goditur në Gaza, më shumë se 100 hyrje tunelesh janë shkatërruar dhe 4,000 armë dhe raketa janë gjetur të fshehura në infrastrukturën civile. Dje u hap një korridor humanitar që zgjati disa orë duke mundësuar kalimin e 637 shtetasve të huaj përmes pikës Rafah.

Disa mjekë në Gaza kanë kryer operacione, duke përfshirë amputime, pa anestezi , tha një zëdhënës i Organizatës Botërore të Shëndetësisë. “Asgjë nuk e justifikon tmerrin që po durojnë civilët,” shtuan ata. Komiteti Ndërkombëtar i Kryqit të Kuq (KNKK) tha se karvani i tij humanitar u sulmua kur po dërgonte furnizime mjekësore thelbësore në objektet shëndetësore në qytetin e Gazës. Mjekët pa Kufij thanë gjithashtu se një nga kolegët e tyre dhe disa nga anëtarët e familjes u vranë në një shpërthim në kampin e refugjatëve Al Shati.

OKB thotë se të gjitha furrat e bukës në veri të Gazës janë mbyllur tani për shkak të “mungesës së karburantit, ujit dhe miellit të grurit”, si dhe për shkak të dëmtimit të shumë prej tyre.

/a.r