Putin: Rusia e gatshme të përballet me ata që na kërcënojnë

Presidenti rus Vladimir Putin tha se forcat e tij janë “gjithmonë të gatshme” për të luftuar kërcënimet e jashtme, teksa iu drejtua turmës të mbledhur në Sheshin e Kuq të Moskës për të festuar fitoren e Bashkimit Sovjetik ndaj Gjermanisë naziste në Luftën e Dytë Botërore.

Kjo ka qenë prej kohësh një ngjarje kyçe në kalendarin e Putinit si një shans për të rritur mbështetjen e publikut dhe për të treguar fuqinë ushtarake të vendit të tij.

Putin e mbajti fjalimin e tij pasi inspektoi ekspozitën tradicionale të tankeve dhe kolonave të trupave që parakalonin nëpër kryeqytet.

“Rusia do të bëjë gjithçka për të mos lejuar fillimin e një konfrontimi global”, tha Putin, duke shtuar: “Por ne nuk do të lejojmë askënd të na kërcënojë, forcat tona strategjike janë gjithmonë të gatshme”.

“Të dashur miq, Rusia po kalon një periudhë të vështirë”, vazhdoi lideri rus, duke thënë se “lufta e atdheut tonë varet nga secili prej nesh”.

“Sot, në Ditën e Fitores, ne e kuptojmë këtë edhe më shumë”, përfundoi ai, duke e mbyllur fjalën e tij me një minutë heshtje.

Rreth 27 milionë njerëz në Bashkimin Sovjetik vdiqën në Luftën e Dytë Botërore, më shumë se në çdo vend tjetër.