SHBA pritet të sanksionojë IDF, Netanyahu: Do të luftoj çdo sanksion të vendosur ndaj batalioneve të ushtrisë izraelite

Kryeministri izraelit Benyamin Netanyahu tha të dielën se do të luftojë kundër vendosjes së sanksioneve ndaj çdo njësie ushtarake izraelite pasi mediat raportuan se Uashingtoni po planifikonte një hap të tillë kundër një batalioni për shkelje të pretenduara të të drejtave.

Të shtunën, faqja e lajmeve Axios raportoi se Uashingtoni po planifikonte të vendoste sanksione ndaj batalionit izraelit Netzah Yehuda që ka operuar në Bregun Perëndimor të pushtuar. Ushtria izraelite tha se nuk ishte në dijeni të ndonjë mase që po merrej.

“Nëse dikush mendon se mund të vendosë sanksione ndaj një njësie të IDF-së (Forcat e Mbrojtjes së Izraelit), unë do ta luftoj atë me të gjitha forcat e mia”, tha Netanyahu në një deklaratë, raporton France24. 

Ushtria izraelite tha se batalioni Netzah Yehuda është një njësi luftarake aktive që vepron sipas parimeve të së drejtës ndërkombëtare.

“Pas publikimeve në lidhje me sanksionet kundër batalionit, IDF nuk është në dijeni për këtë çështje. Nëse merret një vendim për këtë çështje, ai do të rishikohet. IDF punon dhe do të vazhdojë të punojë për të hetuar çdo ngjarje të pazakontë në mënyrë praktike dhe sipas ligjit”, tha ushtria./vizionplus.tv