Spiunoi për Rusinë, burgoset oficeri i ushtrisë gjermane

Një oficer ushtarak gjerman është dënuar me tre vjet e gjysmë burg pasi akuzohet se ka spiunuar për Rusinë.

Personi, i identifikuar si Thomas H, kishte qenë kapiten në zyrën e prokurimeve të ushtrisë kur kontaktoi ambasadën ruse në Berlin dhe transmetoi informacione sekrete ushtarake.

Policia gjermane e arrestoi në qytetin e Koblenz në gusht dhe e akuzoi për ndarjen e fotografive të sistemeve të trajnimit të municioneve dhe teknologjisë së avionëve.

54-vjeçari pranoi në një gjykatë në Düsseldorf të hënën se i kishte kaluar informacione Rusisë, duke thënë se ishte një “ide e keqe” dhe se ai ishte penduar për veprimet e tij.

“Është rrëmuja më e madhe që kam bërë ndonjëherë në jetën time”, tha ai në gjykatë.

Në një deklaratë përmbyllëse, burri tha se kishte kontaktuar me ambasadën pasi u shqetësua për rrezikun e luftës bërthamore të nxitur nga pushtimi i Rusisë në Ukrainë.

Sipas shifrave të qeverisë, Berlini furnizoi Ukrainën me pajisje ushtarake me vlerë rreth 6,6 miliardë euro në 2022 dhe 2023. Kjo përfshinte 40 tanke Leopard 1 dhe 100 automjete luftarake këmbësorie.

Avokati i tij tha se ai ishte ndikuar nga një rrjedhë e propagandës pro-ruse dhe dezinformatave që ai kishte parë në TikTok dhe Telegram në atë kohë. Ai vuri në dukje se klienti i tij ishte bashkuar gjithashtu me partinë e ekstremit të djathtë Alternativa për Gjermaninë (AfD).

Ndërsa prokurorët thanë se i arrestuari kishte zbuluar informacione të ndjeshme ushtarake, ata vunë në dukje se ai nuk kishte zbuluar sekrete shtetërore, një akt që do të kishte sjellë një dënim të përjetshëm.

Në prill, dy burra me shtetësi të ruso-gjermane u arrestuan, të akuzuar për spiunim në bazat e ushtrisë amerikane në Gjermani, ku po trajnoheshin ushtarë ukrainas.

Që nga dhjetori, një punonjës për inteligjencën e brendshme gjermane, Carsten L, është në gjyq i akuzuar për kalimin e të dhënave të klasifikuara tek agjentët rusë.

Dhe në shkurt 2023, një ish-roje sigurie në ambasadën britanike në Berlin u dënua me 13 vjet burg për kalimin e sasive të mëdha të informacionit të ndjeshëm në ambasadën ruse aty pranë./vizionplus.tv