Universitetet amerikane në hijen e luftës në Gaza, konflikte të dhunshme dhe bllokime rrugësh
Më shumë se 1500 persona janë arrestuar në SHBA që nga 18 prilli në universitetet ku kanë shpërthyer përleshje të dhunshme mes protestuesve
Më shumë se 1500 persona janë arrestuar në SHBA që nga 18 prilli në universitetet ku kanë shpërthyer përleshje të dhunshme mes protestuesve pro-palestinezë dhe kundër-demonstruesve nën hijen e luftës në Rripin e Gazës.
Ndërsa protestat pro-palestineze kanë shpërthyer në kampuset e kolegjeve në të gjithë vendin, autoritetet policore vazhdojnë të arrestojnë protestuesit – përfshirë studentë dhe pedagogë.
Sipas CNNi më shumë se 400 protestues u arrestuan të martën. Midis tyre, policia tha se rreth 30 u arrestuan në Universitetin Columbia dhe City College të Nju Jorkut.
Universiteti i Kalifornisë anuloi mësimet të mërkurën dhe u bëri thirrje njerëzve të shmangin zonën ku një natë më parë pati përleshje mes dy grupeve protestuese, pro-palestineze dhe pro-izraelite. Biblioteka e shkollës nuk do të rihapet deri të hënën dhe salla ‘Royce’, për të cilën autoritetet thanë se ishte vandalizuar, do të mbahet e mbyllur deri të premten.
Universiteti ka vendosur oficerë të zbatimit të ligjit në të gjithë hapësirat e universitetit. Protestat nëpër universitetet amerikane filluan në Universitetin ‘Columbia’ si reagim ndaj ofensivës së Izraelit në Gazë dhe pasi Hamasi kreu një sulm terrorist në pjesën jugore të Izraelit më 7 tetor. Militantët vranë rreth 1200 njerëz, shumica prej tyre civilë dhe morën afërsisht 250 pengje.
Duke u zotuar se do të zhdukë Hamasin, Izraeli ka vrarë më shumë se 34,000 palestinezë në Rripin e Gazës, sipas Ministrisë së Shëndetësisë atje që kontrollohet nga Hamasi.
Disa studentë hebrenj, Izraeli dhe mbështetësit e tij i kanë cilësuar protestat universitare si antisemite, ndërsa kritikët e Izraelit thonë se akuzat bëhen për të heshtur kritikat. Ndonëse disa protestues janë filmuar duke bërë komente antisemite ose kërcënime të dhunshme, organizatorët e protestave, disa prej të cilëve janë hebrenj, thonë se kjo është një lëvizje paqësore që synon mbrojtjen e të drejtave palestineze dhe proteston kundër luftës./vizionplus.tv/
What's Your Reaction?
