Ushtroi dhunë ndaj bashkëshortes dhe e kanosi se do ta vriste, arrestohet 50-vjeçari në Dibër

Një 50-vjeçar është arrestuar nga policia e Dibrës, pasi dhunoi bashkëshorten dhe po e kanoste se do ta vriste me armë zjarri, që ai i mbante në banesë.

Menjëherë pas njoftimit, shërbimet e Policisë finalizuan operacionin e koduar “Sllova”, ku parandaluan ngjarjen e mundshme kriminale dhe vunë në pranga 50-vjeçarin nga fshati Vleshë.

Dyshohet se ky shtetas ka ushtruar dhunë fizike në mënyrë të përsëritur ndaj bashkëshortes së tij, si dhe e ka kanosur se do ta vriste me armë zjarri.

Gjatë kontrollit në banesën e tij u gjetën të fshehura në murin rrethues të banesës dhe u sekuestruan 1 armë zjarri automatik, 1 armë zjarri pushkë, 5 krehra dhe 267 municion luftarak.

Njoftimi i Policisë

Shërbimet e Komisariatit të Policisë Dibër, pas njoftimit për një shtetas në fshatin Vleshë, që po dhunonte bashkëshorten dhe po e kanoste se do ta vriste me armë zjarri, që ai i mbante në banesë pa leje, në kuadër dhe të operacionit “Sundimi i Ligjit”, kanë organizuar dhe finalizuar operacionin policor të koduar “Sllova”, ku u parandalua një ngjarje e mundshme kriminale. 

Falë ndërhyrjes në kohë, shërbimet e Policisë kanë arrestuar në flagrancë shtetasin R.H., 50 vjeç, banues në fshatin Vleshë, njësia Administrative Sllovë.

Nga veprimet hetimore dyshohet se ky shtetas ka ushtruar dhunë fizike në mënyrë të përsëritur ndaj bashkëshortes së tij, si dhe e ka kanosur se do ta vriste me armë zjarri.

Gjatë kontrollit në ambientet e banesës së 50-vjeçarit, janë gjetur të fshehura në murin rrethues të banesës dhe u sekuestruan në cilësinë e provës materiale 1 armë zjarri automatik, 1 armë zjarri pushkë, 5 krehra dhe 267 municion luftarak. 

Materialet i kaluan Prokurorisë, për veprime të mëtejshme.

/a.r