Vuçiç falënderon Macron: Nuk firmosim marrëveshje paqeje me Kosovën

Presidenti i Serbisë, Aleksandër Vuçiç komentoi nga Kina deklaratën e fortë në Tiranë të presidentit të Francës, Emanuel Macron që la të hapur edhe mundësinë e pezullimit të liberalizimit të vizave për Kosovën, nëse Prishtina nuk përmbush detyrimet për asociacionin e komunave serbe.

“Nuk dua të komentoj. Është vendim i një prej vendeve më të mëdha evropiane. Faleminderit Macron për shumë gjëra të tjera, për miqësinë që tregon ndaj Serbisë. Për vërejtjen që ai bëri se duhet të dënojmë dhunën në Banjska, ne e bëmë këtë në të njëjtën ditë disa herë. mendoj se këtë ia kam thënë presidentit Macron edhe kur ishim në takimin në Granada”, tha Vuçiç.

I pyetur nga gazetarët, Vuçiç foli edhe për ecurinë e dialogut, për të cilin tha se  shteti serb nuk do të firmosë asnjë deklaratë paqeje me Kosovën.

“Kurti të thotë ‘të kam sjellë një deklaratë paqeje për të nënshkruar’ dhe ti në atë moment mendon se ka sjellë diçka të këndshme për ty për të nënshkruar sepse përdor fjalën ‘paqe’. Ai thjesht harron t’u thotë të gjithëve se marrëveshje paqeje mund të nënshkruajnë vetëm shtete sovrane dhe te pavarura. Pra nëse nënshkruhet, kemi njohur Kosovën e pavarur. Fatmirësisht duhet të kujdesemi për këtë dhe ekspertët na ndihmojnë në punën që bëjmë që të mos ndodhin këto marifete”, u shpreh ai.

Deklaratat e Vuçiç u bënë gjatë një vizite të tij në Kinë, ku u takua edhe me presidentin e Rusisë, Vladimir Putin, me të cilin tha se ka pasur një diskutim të shpejtë.

/a.d