Vuçiç: Pres presion të madh ndaj Serbisë për Kosovën në muajt e ardhshëm!

Presidenti i Serbisë, Aleksandar Vuçiç, ka thënë se pret që “presioni më i madh” për çështjen e Kosovës t’i bëhet Serbisë në janar dhe shkurt.

Në një intervistë për “TV Prva”, Vuçiç ka thënë se ajo është periudha kur fushata e zgjedhjeve parlamentare në BE është në kulm.

“Pasi ashtu mendojnë se do të fitojnë ndonjë votë shqiptare apo ku ta di se çfarë, pasi ata janë të gjithë njerëz që nuk mbështesin vetëm Kosovën e pavarur, por janë lobistë të dalluar shqiptarë. Vetëm këtë duhet ta dinë njerëzit në Serbi. Ata që janë në anën e një liste, ‘Serbia kundër dhunës’ e kritikojnë qeverinë në Beograd, 95 për qind e tyre janë lobistë të shquar shqiptarë”, tha Vuçiç, duke përmendur edhe raportuesen për Kosovën në Parlamentin Evropian, Viola von Cramon.

Vuçiç tha se përgjigja e tij për zyrtarët evropianë mbetet e njëjtë “dhe s’mund të interpretohet në mënyrë tjetër”, ndërsa shtoi se, interesi i Serbisë është “Ballkani i Hapur”.

/a.r